حرباية 
مابتلونش على لونك ياحرباية
عشان الدنيا مش دايمة . ليها نهاية
وكل يومين . باشوف الناس . بألف حكاية وحكاية
ودايما دق فوق الراس
وبارجع ويا ضحكاية
وبانسى الهم وأنسى الناس
وعايش باللي جوايا
وبأقعد ويا نفسي كتير
تلومني وتتعب معايا
بتحكي تعد في المواويل
وجايبة معاها ١٠٠ آية
تشوف الغدر . زي البدر . شعار والكدب له راية
نفاق الناس . بدون إحساس . طرق مرسومة بعناية
تبص عليا تستغرب . عشان الراحة جوايا
ومهما تعبت . ليا دليل . باشوف الدنيا فيه مراية
وبارجع تاني لضميري . ورب الكون ليَ حماية
راسملي طريقي بهِداية
ومهما الناس . تعيش في الدنيا قساية
هاقيس تاني الحياة بمقاس
ميزان الرحمة فيه غاية
ولو غيرتي لون ورا لون يا دنيايا
ما بتلونش على لونك ياحرباية
شادوليات
شاذلي محمد عبدالرحمن حسين
أكاديمية رياض الشعر والأدب 