•••••عايدوني انا سورية مالي عيد •••••
اجا العيد وراح العيد
وماسلم عليي
مش عارف هو انا زغيره
ولا هو فوق بعليه
شعراته بيض وعكازته خضره
دمعه بعيونه مش عارف
هو مني خايف
ولا خايف عليي
والنجم بالسما يحبي
وبسلته خيرات مخبي
يفطر الصايمين خبز وعنبر
وتفاح احمر واخضر
وكعك العيد بجوز وسكر
اجا وماسلم عليي
دموعي عخدي مزراب
مش عارف هو انا فقيره
ولا داري خراب
ياعيد انا داري حد الصخره
مش عارف اي صخره
عرجلي صخره وعضهري صخره
اجا وماسلم عليي
انا بيتي دمار
ولبسوني توب العار
وحكوا عليي
محل ماكنا نلعب ونحن زغار
محل مابنى الدوري عشه
حيطها واطي خشه
انا بيتي جنب الطريق
وبيي نايم وما عم يفيق
اخواتي ياعيد
مش عارف راحو من زماااان
مع الريح راحو لبعيد
باول الشتويه
وآخر الصيفيه
يمكن بموسم الرمان
اجا وماسلم عليي
قالوا واحد شهيد
وواحد شريد
وواحد بيرضع عبطنه صخره
وامي ماتت من قهره
واختي ذبحوها للوريد
كانت ورده حمره مش صفره
وراح العيد لبعيد
وماعيد عليي
انا الشاااااام ياعالم انا العيد
انا الرجوله وام الوليد
انا ابني عيد وخيي عيد
وبيي عيد واجا وراح العيد
وماسلم عليي
انا اختي عموريه
وأمي جولانيه
وبعدني صبيه
وبيي المعتصم
وماااات المعتصم
انا خيي صلاح الدين
نايم بحضني ليوم الدين
انا من حارة الياسمين
أنا شاميه
وسورية
اجا العيد
وماسلم عليي
انا الشام ياعرب
انا الشام وااسلاماه
ياااعرباه
يااااويلاه
انا ام الشهيد
وبنت الشهيد
واخت الشهيد
ومشان هيك مالي عيد
اجا العيد وراح العيد وماسلم عليي
تركته نايم بعليه
وجهه اصفر
وريحه عنبر
عم يحلم بامه سوريه
بقلم شاعر الجولان
خالد سويد
أكاديمية رياض الشعر والأدب 