( يا موج البحر )
*
يا موج البحر يا مسافر
سايب وراك شطآن
سايب وراك أوطان
ياما وراك حكايات
ياما وراك أخبار
كم قلب بات مجروح
و غيره بات فرحان
ولا نقلت كلام
ولا حكيت أسرار
يا موج البحر يا مسافر
سايب وراك شطآن ————
يا موج البحر يا مالح
مع إن من قبل التاريخ
بتصب فيك أنهار
مع إن من يوم الخليقه
لحد اليوم
تنزل عليك أمطار
و لسه ميّتَك مالحه
ولا عمرك سقيت عطشان
يا موج البحر يا مسافر
سايب وراك شطآن ————-
يا موج البحر يا مفارق
و إمتى راح تعود تانى
يا موج البحر انا صاحبك
هاتمشى…
هابقى وحدانى !
أنا شكلك …
و فِيَّا حاجات
كتير شبهك
ساعات أهدى ، وساعات أغضب
ساعات أجرى ، ساعات أهرب
صحيح باغضب
غضب محدود … و باتسامح
و عمرى ما كنت يوم … مالح
صحيح باجرى … لكن باتعب
وأنت… ما فى… أي شيء هَدَّك
و عندى ضِلْ …لما أمشى
و انت يا بحر .. ما عندك —————
يا موج البحر انا وِدّى
من قبل ما تمشى…
و تعدى
تكلمني و تحكيلى
يا موج البحر خُدْ ..
وِ ادّى
إحكيلى عن ابويا
و احكيلى عن جدى
إحكيلى عن أهلى زمان
أهلى اللى نحتوا الصخر
أهلى اللى ركبوا البحر
وفتحوا ياما بلاد
من عند سور الصين
إلى جبل طارق
يا موج البحر يا مفارق
إحكى لى عن حطين
و احكيلى عن طارق —————
إحكيلى ع اللى معاه
قوللي … قالولوا أيه
لما حرق سفنه
و حلف ما هو راجع
ماخفوش ولا اتهزوا
سبع قرون قعدوا
ف أروبا زرعوا الحضارة
خدوها – الغرب –
و اجتهدوا
واحنا بقينا فين !
يا موج ماتسألنيش
عن أهلى دلوقتي
خلينى ف امبارح
اهلى اللى كانوا زمان
يا موج البحر يا مسافر
سايب وراك شطآن ————-
د . محمد الفقى
٢٠٢٢/٧/١٣
أكاديمية رياض الشعر والأدب 