حْوَالْ الناسْ!
(زجل مغربي)
بغيت نفهم حوال الناس ولعباد
لقيت فطريقي كثرة لحفاري ولوتاد
تلفت، وتلف ليا معاهم لحساب
ما فهمت، ما لقيت لسؤالي جواب
واحد يبغي يعبر على عذابو
يبوح بلكلام ساكن فݣلبو
ولاخر مضايق ومجروح
يحسبو عدو ما بغاه يبوح
واش لبوح تعبير من قلب صادق
بلا مراوغة تحكي او ما تنافق
ولا محتاكر على بعضين
بوحدهم من دون لخرين
المعݣور لمن يعاود كلامو
ويفوج على محاين همومو
براكة من الكره الساكن فلݣلوب
ديها فراسك وتخلق وكن محبوب
لكلام ماشي ورثك بوحدك
خلاه ليك بوك ولا جدك
لكلام دوى يشافي ماشي بهوت
قبل ما يتسمع ويوزنوه لخوت
ݣول كلامك ولاخر يݣول كلامو
الفن شريف والمتكبر يمشي فحالو
آه من ݣلوب الكره والبغض
يظنو ما بحالهم فالحركة حد
اللغى كثير، متنوع وكلا يلغي بلغاه
علاش واحد باين ولاخر دخلوه جواه
لكلام الا تفقد منو الحب والخير
بلاش منو يسبب غير الكره لكثير
ولد مقنين ينشد، يطرب وحنين
ما متكبر على موكة بغناه الزين
(ولد مقنين : طائر الحسون)
-بقلم: محمد دومو
-مراكش/ المغرب
أكاديمية رياض الشعر والأدب 